Die plaaslike subraad van wyk 29 het Donderdag 23 Mei verskeie gemeenskapslede vereer vir hul bydraes tot ontwikkeling in en om Atlantis.
Volgens Cynthia Clayton, wyksraadslid en voorsitter van Subraad 1, is die wyk gewis ’n beter gebied weens insae van gemeenskapsleiers. Clayton het voorts gesê die vennootskap tussen die Stad Kaapstad en die plaaslike gemeenskap is die steunpilaar vir sukses in die gebied.
“Dit sal ’n jaarlikse instelling word waar lede in die gemeenskap vereer sal word,” het sy gesê.
Van dié gemeenskapslede wat vereer is, was Sasha-Lee Davids, ’n voormalige Idols-wenner wat deesdae ’n aanbieder op Pasella is.
“Atlantis en wyk 29 is bevoorreg om persoonlikhede en opkomende sportsterre hier te hê,” het sy gesê.
Weskus Nuus se eie joernalis, Murphy Roberts, is ook vereer vir sy werk met betrekking tot plaaslike nuusdekking.
