Twee organisasies sonder winsbejag het koppe bymekaar gesit om kinders met sokkerballe te help.
Volgens Mishka Ganief en Peter Gomez van die (Atlantis Concerned Citizens) ACC, is hulle reeds ’n geruime tyd besig om ’n oop veld in Grosvenorlaan skoon te maak, waar kinders sokker kan speel.
Volgens Gomez, ondervoorsitter van dié organisasie, wil hulle graag met die jongspan in Atlantis verenig en wil hulle vrede onder strydende groepe bewerkstellig. Hy sê kinders word gebrandmerk aan die omgewing waarin hulle woon en is nie welkom in ander gebiede nie.
Die motorgroep MK1 Lifestyle, wat gereeld by verskillende projekte betrokke is, sê hulle is baie opgewonde oor die projek en daarom het hulle die balle geskenk. Die groep sê verder hulle wil graag meer betrokke raak by die projek en gaan Gomez en sy span met ander toerusting ook bystaan.
