Hamlets van Mamre het by die Darling-sewestoernooi Saterdag 3 Februarie die beste van al die plaaslike spanne gevaar.
Die spanne van Atlantis- en Mamre-rugbyklub kon eenvoudig nie die mas opkom nie en Hamlets het oor die voorlaaste hekkie gestruikel toe die span teen Belhar in die halfeindstryd met 14-28 vasgeval het.
Hamlets het reeds vroeg gewys dat hy vir die gesogte eerste prys van R8 000 speel toe die span Northens in ’n naelbytwedstryd met 12-5 geklop het.
Hamlets het in sy tweede wedstryd na ’n hoër rat oorgeskakel en Dassenberg met 29-0 afgeransel vir ’n plek in die laaste 16, waar hy Newtons van Wellington maklik met 33-12 geklop het.
Die kwarteindstryd teen Hands & Hearts was egter op ’n mespunt gebalanseer, maar die Mamriete het vasgebyt vir ’n welverdiende 26-5 oorwinning.
Belhar, wat die toernooi gewen het, het egter die span se dag bederf en het die span sy enigste nederlaag toegedien in die laaste vier.
