Die Young Hearts-rugbyklub het Saterdag wel met 5-10 op sy tuisveld teen Abbotsdale vasgeval, maar het die toets geslaag.
Dit was die tuisspan se eerste vriendskaplike wedstryd teen ’n span wat lank in die Boland se topliga speel waar Pella ook die seisoen in aksie sal wees.
Die begeesterde Pellaspan het baie goeie rekenskap van homself gegee en het ook ’n duidelike boodskap uitgestuur dat die spelers beslis ’n harde neut is om te kraak.
Die tuisspan, met sy rotsvaste verdediging, het die besoekers geen ruimte gegee op die aanval nie.
Pella se verdediging het egter kort voor rustyd geknak en die besoekers kon gaan water drink met 5-0 voor. Pella wat die meeste gebiedsvoordeel geniet het, kan homself skuld gee, want sy gevaarlike agterlyn het meer as genoeg kanse geskep wat eenvoudig nie gebruik is nie.
Abbotsdale wat by tye onder geweldige druk in sy doelgebied was, het egter kop gehou om die tuisspan punte te verhoed.
Pella het die tweede helfte goed begin en het in die eerste 10 minute die telling gelykop gemaak.
Pella het daarna een aanval na die ander van stapel gestuur en het weer baljaar met gebiedsvoordeel en balbesit. Die voorspelers het ook gesorg vir omgekeerde besit, maar besluitneming het die tuisspan duur gekos.
Die blitsige vleuel van Pella, Barry Adonis, het die besoekers na wind laat gryp met sy spoed en aftrap, maar kon nie die wedstryd vir sy span seël nie.
Die besoekers het egter kort voor die einde ’n dolk in die ondersteuners van die tuisspan se harte gedruk en het die wendrie gedruk.
