Atlantis-rugbyklub het op Jeugdag sy eerste skole-rugbytoernooi aangebied en ten spyte van verskeie skole wat op die nippertjie onttrek het, was die dag ’n “reuse-sukses”, volgens die organiseerders.
Tydens die toernooi het vyf skole mekaar Saterdag 15 Junie op die Proteapark-sportterrein gepak.
Volgens Anthea Jansen, bestuurder van die klub, sal die toernooi beslis ’n jaarlikse instelling word. Sy meen die rugby in die gebied kan net baat vind by die ontwikkeling.
Jansen sê voorts baie ouers besef nie wat hul teenwoordigheid langs die veld vir die kinders se selfvertroue beteken nie. Slegs ’n handjievol ouers het hul kinders ondersteun en dit is kommerwekkend, sê Jansen.
Die organiseerders het hul borge – Weskus Nuus, Radio Atlantis en MK1 Lifestyle – bedank vir hul bydrae om die dag moontlik te maak.
