Drie onoorwonne spanne blaas in mekaar se nekke vir Atlantis-sokkervereniging se Premiertitel.
Die spanne verskil almal een punt van mekaar op die punteleer; Aberdeen (20), Jomos Power (19) en Robinvale Spurs (18).
Jomos het nog een ligawedstryd oor om te speel, terwyl Aberdeen en Spurs elk twee wedstryde oor het.
Beslissings oor uitstaande verhore is nog hangend by die dissiplinêre komitee en dié beslissings kan ook nog die ligapunteleer heelwat deurmekaarkrap.
Atlantis City, wat ’n buitekans het, het Saterdag 12 Augustus teen die ligavoorloper, Aberdeen met 2 – 2 gelykop gespeel.
Robinvale het sy wedstryd teen Atlantis Leeds United met 3 – 0 gewen terwyl Jomos Power vir Parklands ’n stewige pakslae gegee het met 10 – 2. Die Witsand-derby tussen FC Bayern en Atlantis Arsenal was gewen deur Bayern met 1 – 0, terwyl Pella Sporting die melkkoeie, Chatsworth Rising Stars, met 6 -1 gewen het.
Saterdag se Premierprogram is: Aberdeen teen Robinvale Spurs, Jomos Power teen Arsenal, FC Bayern teen Pella Sporting, Wesfleur teen Parklands en Leeds United teen Rising Stars.
Al die wedstryde begin om 15:30.
Sondag 20 Augustus: Atlantis City teen Leeds United, Wesfleur teen Aberdeen, Rising Stars teen Robinvale Spurs 15:30, Pella Sporting teen Arsenal en Parklands teen FC Bayern om 14:00.
