Kry julle huis in orde!
Só het die burgemeester, Dan Plato, aan meer as 500 inwoners gesê. Plato het as deel van sy uitreikprogram die dorp 11 September besoek en na die klagtes oor behuising geluister.
“Die Stad kan nie met klomp verskillende organisasies praat nie,” het Plato beklemtoon. Hy het ook die gemeenskaps-organisasies aangemoedig om uit een mond te praat. Die Mamre-inwonersvereniging, wat die inwoners verteenwoordig, en die Mamre-vereniging vir gemeenskaplike eiendom, wat die grond bestuur, is tans in ’n tweestryd gewikkel oor die behuisings-kwessie. Plato sê hy verstaan mense se frustrasies, maar die Stad kan niks op private grond doen nie en het aanbeveel dat daar dringend met die organisasies en die Stad se regsverteenwoordigers vergader moet word om kwelpunte uit die weg te ruim. By Junie se subraadvergadering is ’n mosie ingedien vir terugvoering oor ontwikkeling in Mamre. Munisipale amptenare moes glo 19 September by die raadsvergadering terugvoering gee. Niemand het opgedaag nie. Raadslede het hul ontevredenheid daaroor uitgespreek.
Fiona Abrahams, propor-sionele ANC-raadslid, het gesê privaat vergaderings deur raadslede met die gemeenskap moet stop en alle behuisingskwessies moet deur die subraad hanteer word.
